بھارت کو ملنے والے نرخ پر ملے تو روس سے ایندھن لے سکتے ہیں ، اس پر مغرب کو اعتراض نہیں ہوگا،اسحاق ڈار

واشنگٹن(ویب ڈیسک)پاکستان کے وزیر خزانہ اسحاق ڈار نے کہا ہے کہ بھارت کو ملنے والے نرخ پر ملے تو روس سے ایندھن لے سکتے ہیں ، اس پر مغرب کو اعتراض نہیں ہوگا. 31اکتوبر کو ختم ہونے والے آئی ایم ایف کے اجلاس کے بعد پاکستان دہشت گردوں کی مالی معاونت کی روک تھام کے ادارے فنانشل ایکشن ٹاسک فورس (ایف اے ٹی ایف) کی گرے لسٹ سے بھی نکل جائے گا،ڈالر کی قیمت کو اصل قد ر پر لایا جائے تو مہنگائی میں خاطر خواہ کمی ہو جائے گی،پاکستان آئی ایم ایف پروگرام کو پورا کرے گا اور اس پر مزید کوئی مذاکرات نہیں ہوں گے اور پاکستان اپنے بانڈز کی بھی مکمل ادائیگیاں کرے گا۔ واشنگٹن ڈی سی میں امریکی میڈیا کو دیے گئے خصوصی انٹرویو میں اسحاق ڈار نے کہا کہ پاکستان کا عالمی مالیاتی ادارے (آئی ایم ایف)کے ساتھ موجودہ قرض پروگرام اتحادی حکومت کی طرف سے کی گئی ایک ایکسٹینشن کے بعد اگلے سال جون میں پورا ہو رہا ہے تاہم ملک میں حالیہ سیلاب کے بعد آئی ایم ایف نے اس تشویش کا اظہار کیا تھا کہ پاکستان قرضوں کی معافی اور اس کی ری شیڈولنگ کے لیے پیرس کلب جائے گا۔ آئی ایم ایف کی تشویش پر بات کرتے ہوئے اسحاق ڈار نے بتایا کہ انہوں نے اپنے حالیہ دورہ امریکامیں یہ غلط فہمی دور کر د ی اور پاکستان تمام قرضے بروقت ادا کرے گا۔ اسحاق ڈار نے ملک کے موجودہ معاشی مسائل کا ذمے دار عمران خان کی سابق حکومت کو قرار دیتے ہوئے کہا ہے کہ بدترین حکمرانی کی وجہ سے سابق حکومت ویسے ہی تباہی کی جانب جارہی تھی، ایسے میں اپوزیشن نے سیاست کے بجائے ریاست کو بچانے کا فیصلہ کیا جس کی قیمت ہمیں ادا کرنا پڑرہی ہے۔