عمران خان 33 حلقوں میں ہونے والے ضمنی انتخابات لڑیں گے، پی ٹی آئی

لاہور(ویب ڈیسک )پاکستان تحریک انصاف نے اعلان کیا ہے کہ چیئرمین پاکستان تحریک انصاف عمران خان قومی اسمبلی کے 33 حلقوں میں ہونے والے ضمنی انتخابات لڑیں گے۔ پی ٹی آئی کی جانب سے مخدوم شاہ محمود قریشی اور اسد عمر نے میڈیا بریفنگ میں کہا کہ قوم مطالبہ کر رہی ہے کہ ملک میں فی الفور انتخابات کرائے جائیں، تحریک انصاف سیاسی میدان میں موجود رہے گی۔ شاہ محمود قریشی نے کہا کہ عمران خان کے خلاف ہونی والی تمام سازشوں کو ناکام بنائیں گے، پی ٹی آئی اب سیاسی میدانوں میں ان کا مقابلہ کرے گی۔ انہوں نے واضح طور پر کہا کہ اسٹیبلشمنٹ کے ساتھ اس وقت ہمارا کوئی رابطہ نہیں ہے۔ سابق وزیر خارجہ نے کہا کہ ہم عوام کی کچہری میں سرخرو ہوں گے، آج تحریک انصاف کی کور کمیٹی اور پارلیمانی کمیٹی کا اجلاس ہوا جس کی صدارت عمران خان نے کی،اجلاس میں ملکی سیاسی اور معاشی صورتحال کا جائزہ لیا گیا، تحریک انصاف کے اجلاس میں4 قراردادیں منظور کی گئیں۔ پی ٹی آئی کے سینئر وائس چیئرمین مخدوم شاہ محمود قریشی نے کہا کہ آئین اسمبلی کی تحلیل کے 90 روز میں انتخابات کرانے کا پابند ہے۔ انہوں نے کہا کہ تحریک انصاف نے فواد چودھری کی گرفتاری پرشدید تشویش کا اظہار کرتے ہوئے چیف جسٹس سے اپیل کی کہ وہ فواد چودھری کی گرفتاری کا از خود نوٹس لیں۔ انہوں نے کہا کہ امید کرتے ہیں فواد چودھری کو انصاف ملے گا اور رہائی ملے گی، موجودہ صورتحال پر لائحہ عمل مرتب کیا جائے گا۔ پی ٹی آئی کے مرکزی سیکریٹری جنرل اسد عمر نے میڈیا بریفنگ میں کہا کہ صدر مملکت پی ٹی آئی کے خلاف درج جھوٹے مقدمات اور دھمکی آمیز فون کالز کا نوٹس لیں جب کہ پی ٹی آئی نے خیبرپختونخوا میں 90 دن کے اندر انتخابات کرانے کیلے پشاورہائیکورٹ سے بھی رجوع کرنے کا فیصلہ کیا ہے۔ سابق وفاقی وزیر اسد عمر نے کہا کہ فوری انتخابات کے لیے کل پشاورہائی کورٹ میں درخواست دائر کریں گے، پی ڈی ایم نے اپنی سنگین بدانتظا می کے ذریعے عوام کو 50 برس کی بد ترین مہنگائی کا تحفہ دیا ہے۔ اسد عمر نے کہا کہ ان کی پالیسی سے لاکھوں لوگ بے روز گار ہوگئے ہیں، انہوں نے ملک کو دیوالیہ پن کی دہلیز پر لاکھڑا کیا ہے۔