چیئرمین پاکستان تحریک انصاف عمران خان نے اتوار کو دن دو بجے مینار پاکستان پر جلسہ کا اعلان کر دیا

لاہور: چیئرمین پاکستان تحریک انصاف عمران خان نے اتوار کو دن دو بجے مینار پاکستان پر جلسہ کرنے کا اعلان کرتے ہوئے کہا ہے کہ ساری قوم کو مل کر جدوجہد کرنی ہو گی۔انہوں نے پی ٹی آئی کی ریلی سے خطاب کرتے ہوئے کہا توشہ خانہ کیس میں دودھ کا دودھ پانی کا پانی ہو گیا، فارن فنڈنگ کیس میں ن لیگ کی فنڈنگ سامنے آئی تو سب پتا چل جائے گا۔ سابق وزیراعظم نے خطاب کرتے ہوئے کہا ریلی سے واضح ہوگیا کہ حکومت ہم سے کیوں خوفزدہ ہے؟ 8 مارچ کو حکومت نے ہماری ریلی کو روکا۔ انہوں نے کہا کارکنوں پر تشدد کرنے والوں کو سزا دلواؤں گا، کبھی ذاتی مفاد کے لیے سڑکوں پر نہیں نکلا، یہ میری نہیں بلکہ سب کی جنگ ہے، ہمیں روکنے کے لیے تمام حربے استعمال کیے جا رہے ہیں۔عمران خان نے کہا یہ چاہتے ہیں کہ عمران خان کو الیکشن سے باہر کیا جائے، میرے اوپر 80 کیسز درج کیے گئے ہیں۔چیئرمین پی ٹی آئی عمران خان نے ریلی کے شرکا سے خطاب کرتے ہوئے دعویٰ کیا کہ ن لیگ اور پیپلزپارٹی کی فارن فنڈنگ سے متعلق جلد نیا انکشاف ہونے والا ہے۔واضح رہے کہ عمران خان کی قیادت میں زمان پارک سے نکالی جانے والی ریلی مختلف راستوں سے ہوتی ہوئی داتا دربار پہ اختتام پذیر ہوئی ہے۔