ایشیا کپ میں پاکستان کا فاتحانہ آغاز، نیپال کو 238 رنز سے ہرادیا

ایشیا کپ میں پاکستان نے فاتحانہ آغاز کرتے ہوئے نیپال کو باآسانی 238 رنز کے بھاری مارجن سے شکست دے دی۔ پاکستان کے 343 رنز کے ہدف کے تعاقب میں نیپالی ٹیم 104 رنز بنا کر آل آؤٹ ہوگئی۔ ملتان کرکٹ اسٹیڈیم میں ایشیا کپ 2023 کے افتتاحی میچ میں پاکستان نے نیپال کے خلاف ٹاس جیت کر پہلے بیٹنگ کا فیصلہ کیا۔ پاکستان کی جانب سے فخر زمان اور امام الحق نے اننگز کا آغاز کیا جس کے بعد 5.3 اوورز میں قومی ٹیم کی پہلی وکٹ 21 رنز پر گر گئی جب فخر زمان 14 رنز بنا کر کیچ آؤٹ ہوئے۔اگلے ہی اوور کی پہلی گیند پر پاکستان کی دوسری وکٹ 25 رنز پر گر گئی جب امام الحق 5 رنز بنا کر رن آؤٹ ہوگئے۔ کپتان بابر اعظم اور وکٹ کیپر بیٹر محمد رضوان نے ٹیم کو 86 رنز کی پارٹنرشپ فراہم کرکے سہارا دیا۔ تاہم 111 کے مجموعے پر 44 رنز بنانے کے بعد محمد رضوان رن آؤٹ ہوگئے،

وہ رننگ کے دوران لڑکھڑا کر تیز نہ بھاگ سکے۔ نئے آنے والے بلے باز آغا سلمان 5 رنز کے مہمان ٹھہرے اور 124 کے مجموعے پر نیپال کے تجربہ کار بولر سندیپ لمیچنے کی گیند پر ریورس سوئپ کھیلنے کی کوشش میں کیچ آؤٹ ہوئے۔ بابر اعظم کا ساتھ دینے کے لیے افتخار احمد آئے اور دونوں نے 131 گیندوں پر 214 رنز کی پارٹنرشپ بنا کر ٹیم کو بڑے ٹوٹل تک پہنچایا۔بابر اعظم نے اپنے کیریئر کی 19ویں سنچری مکمل کی اور آخری اوور میں 151 رنز پر بنا آؤٹ ہوئے۔ ان کی اننگز میں 14 چوکے اور 4 چھکے شامل تھے۔ دوسری جانب افتخار احمد نے اپنے کیریئر کی پہلی سنچری داغی اور 71 گیندوں پر 109 رنز بنا کا ناقابلِ شکست رہے۔ انہوں نے 11 چوکے اور 4 چھکے لگائے۔

پاکستان ٹیم مقررہ پچاس اوورز میں 6 وکٹوں کے نقصان پر 342 کا ہندسہ بورڈ پر سجانے میں کامیاب رہی۔ نیپال کی جانب سے سومپال کامی نے 2 کھلاڑیوں کو آؤٹ کیا جبکہ کرن کے سی اور سندیپ لمیچنے نے ایک ایک وکٹ لی۔ ہدف کے تعاقب میں نیپال کی ٹیم کا آغاز اچھا نہ تھا، شاہین آفریدی نے پہلے ہی اوور میں 2 وکٹیں لے کر حریف بڑا جھٹکا دے دیا۔ انہوں نے کوشال بھرتل اور کپتان روہیت پوڈیل کو پویلین کی راہ دکھائی۔ دوسرے اوور میں نسیم شاہ نے آصف شیخ کو آؤٹ کرکے نیپالی ٹیم کےلیے ہدف تقریباً ناممکن بنادیا۔

چوتھی وکٹ پر عارف شیخ اور سومبال کامی نے 59 رنز کی پارٹنرشپ بنا کر اپنے فینز کو انجوائے کرنے کا موقع دیا، تاہم 73 کے مجموعے پر عارف شیخ کے حارث رؤف کی گیند پر بولڈ ہونے کے بعد گرین شرٹس نے نیپال کو سنبھلنے کا موقع نہ دیا۔ یکے بعد دیگرے وکٹیں گرتی رہیں اور نیپالی بیٹنگ لائن 24ویں اوور میں 104 رنز پر ہی سمٹ گئی۔ سومپال کامی نے 28 اور عارف شیخ نے 26 رنز کی اننگز کھیلی۔ پاکستان کی جانب سے شاداب خان 4 وکٹیں لے کر کامیاب بولر ٹھہرے۔ ان کے علاوہ شاہین آفریدی اور حارث نے دو دو جبکہ نسیم شاہ اور محمد نواز نے ایک کھلاڑی کو آؤٹ کیا۔ پاکستان کے کپتان بابر اعظم کو شاندار بیٹنگ پرفارمنس پر میچ کا بہترین کھلاڑی قرار دیا گیا۔

ٹاس: ملتان کرکٹ اسٹیڈیم میں ٹاس جیتنے کے بعد گفتگو کرتے ہوئے پاکستان کرکٹ ٹیم کے کپتان بابر اعظم نے کہا کہ پچ دیکھنے میں اچھی لگ رہی ہے، ہم اپنی کرکٹ انجوائے کریں گے۔ بابر اعظم نے کہا کہ ایشیا کپ میں اچھی کرکٹ کھیلیں گے۔ اس موقع پر نیپال کرکٹ ٹیم کے کپتان روہت پوڈیل نے کہا کہ ہم پہلی مرتبہ ایشیا کپ کھیل رہے ہیں۔ پاکستان ٹیم آج کے میچ کے لیے پاکستان کرکٹ ٹیم میں امام الحق، فخر زمان، بابر اعظم، محمد رضوان، سلمان علی آغا، افتخار احمد، شاداب خان، محمد نواز، شاہین آفریدی، نسیم شاہ اور حارث رؤف شامل تھے۔

میچ شروع ہونے سے قبل ملتان کرکٹ اسٹیڈیم میں ایشیا کپ کی افتتاحی تقریب بھی ہوئی جس کے دوران پاکستانی رنگ میں رنگے غبارے فضا میں چھوڑے گئے۔تقریب میں پاکستانی گلوکارہ آئمہ بیگ اور نیپالی گلوکارہ تریشالا گرونگ نے اپنی آواز کا جادو جگایا۔