لطیف کھوسہ کی پی ٹی آئی میں شمولیت پر بیرسٹر گوہر کا خیر مقدم

ممتاز ماہر قانون اور سابق گورنر پنجاب سردار لطیف خان کھوسہ کے پاکستان تحریک انصاف (پی ٹی آئی) میں شمولیت پر پارٹی چیئرمین بیرسٹر گوہر نے انکا خیر مقدم کیا ہے۔ اپنے بیان میں بیرسٹر گوہر نے کہا کہ لطیف کھوسہ کے پی ٹی آئی میں شامل ہونے پر خیرمقدم کرتا ہوں اور انہیں مبارکباد بھی پیش کرتا ہوں۔ پی ٹی آئی کی جانب سے کہا گیا کہ سردار لطیف خان کھوسہ ملکی سیاست اور شعبہ قانون کا بڑا نام ہیں، ان کی شمولیت سے تحریک انصاف کو غیر معمولی تقویت میسّر آئے گی۔ ترجمان پی ٹی آئی کا کہنا ہے کہ سردار لطیف خان کھوسہ کی تحریک انصاف میں شمولیت سے ملک میں قانون کی حکمرانی اور جمہوریت کے بقاء و استحکام کی جاری تحریک مضبوط ہوگی۔ پاکستان تحریک انصاف کی جانب سے کہا گیا کہ سردار لطیف خان کھوسہ کا بھرپور خیرمقدم کرتے ہیں۔ ان کے فیصلے کو قدر و تحسین کی نگاہ سے دیکھتے اور باہم مل کر پاکستان کو دستور و جمہوریت کی راہ پر ڈالنے کی جدوجہد منزل تک پہنچانے کے عزم کا اظہار کرتے ہیں۔