ڈیلاس پیس اینڈ جسٹس سینٹر کا کشمیری رہنما یاسین ملک کی رہائی کا مطالبہ

ڈیلاس پیس اینڈ جسٹس سینٹر نے کشمیری رہنما یاسین ملک کی فوری رہائی پر زور دیا ہے تاکہ خطے میں پرامن مذاکرات کو دوبارہ شروع کیا جا سکے۔ ڈیلاس پیس اینڈ جسٹس سینٹر کی جانب سے جاری کردہ بیان میں یہ کہا گیا ہے کہ ہم سمجھتے ہیں کہ جنوبی ایشیاء میں تنازعات کے حل اور دیرپا امن کے قیام کی کلید بات چیت ہے۔ بیان میں کہا گیا ہے کہ یاسین ملک، ایک سرکردہ رہنما اور جموں کشمیر لبریشن فرنٹ (JKLF) کے چیئرمین طویل عرصے سے کشمیر کے لوگوں کے حقوق اور امنگوں کے وکیل رہے ہیں، ان کی قید ایک پرامن حل کی طرف پیش رفت میں رکاوٹ ہے۔ بیان میں مزید کہا گیا ہے کہ ہم متعلقہ حکّام سے مطالبہ کرتے ہیں کہ یاسین ملک کو رہا کیا جائے اور انہیں مذاکراتی عمل میں فعال طور پر حصہ لینے کی اجازت دی جائے اور ایسا کرنے سے درج ذیل فوائد حاصل کیے جا سکتے ہیں:
1- بات چیت کا دوبارہ آغاز

یاسین ملک کی رہائی اسٹیک ہولڈرز کے درمیان بامعنی بات چیت کے لیے سازگار ماحول پیدا کرے گی جس سے تنازعہ کشمیر کے پرامن حل کو فروغ ملے گا۔ 2- اعتماد سازی کے اقدامات بات چیت کے عمل میں یاسین ملک کی شمولیت اعتماد سازی کے اقدام کے طور پر کام کرے گی جو شمولیت کے عزم اور تمام متعلقہ فریقوں کی مصروفیت کا مظاہرہ کرے گی۔

3- کشمیری عوام کی نمائندگی

یاسین ملک کی رہائی کشمیری عوام کی امنگوں اور خدشات کی نمائندگی کو یقینی بنائے گی اور مذاکرات کے دوران ان کی آوازوں کو سننے اور غور کرنے کی اجازت دے گی۔ عزت مآب، ہماری تنظیم اس بات پر پختہ یقین رکھتی ہے کہ پرامن ذرائع سے کسی بھی مسئلے کو حل کیا جا سکتا ہے چاہے وہ کتنا ہی پیچیدہ کیوں نہ ہو۔ کشمیر کے لوگوں کو بات چیت کو جاری رکھنے کے لیے امن و سکون کا ماحول درکار ہے اور یاسین ملک اپنے حقوق کے لیے جدوجہد اور طویل عرصے سے چلتے ہوئے مسئلۂ کشمیر کے پرامن حل میں بہت سے کشمیریوں کی آواز رہے ہیں لہٰذا، ان کی جگہ مذاکرات کی میز پر ہے جیل میں نہیں۔