ٹی 20 ورلڈکپ، پاکستانی ویمن ٹیم کے ہاتھوں آئر لینڈ کو شکست

کیپ ٹاؤن: انٹرنیشنل کرکٹ کونسل (آئی سی سی) ویمن ٹی 20 ورلڈکپ میں پاکستانی ٹیم نے آئر لینڈ کو 70 رنز سے شکست دے دی۔ کیپ ٹاؤن میں جاری ویمن ٹی 20 ورلڈکپ کے میچ میں پاکستان نے پہلے بیٹنگ کرتے ہوئے آئر لینڈ کو 166 رنز کا ہدف دیا تاہم ہدف کے تعاقب میں آئرلینڈ کی ٹیم 95 رنز پر ہی ڈھیر ہوگئی۔ پاکستانی بیٹر منیبہ علی نے آئر لینڈ کے خلاف 102 رنز کی اننگز کھیلی اور پہلی ٹی 20 ورلڈکپ میں سنچری کرنے والی پہلی خاتون بن گئیں۔منیبہ علی نے 68 گیندوں پر 14 چوکوں کی مدد سے 102 رنز بنائے۔ ندا ڈار نے 28 گیندوں پر 33 رنز اور عائشہ نسیم نے 2 گیندوں پر 6 رنز بنائے۔ پاکستان کی نشرا سندھو نے 4 کھلاڑیوں کو آؤٹ کیا جبکہ سعدیہ اقبال اور ندا ڈار نے 2، 2 وکٹیں حاصل کیں۔