ایران کا بھی اپنا وفد سعودی عرب بھیجنے کا فیصلہ

تہران :چین کی ثالثی کے بعد سعودی عرب اور ایران کے درمیان سفارتی تعلقات کی بحالی کے لیے دونوں ممالک کی جانب سے پیشرفت میں اہم بات سامنے آئی ہے، سعودی وفد کے بعد اب ایرانی وفد جلد ریاض جائے گا۔واضح رہے کہ سعودی عرب اور ایران نے 2016 کے بعد سفارتی تعلقات کی بحالی کا فیصلہ کیا جس کے بعد دونوں ممالک کے وزرائے خارجہ کی ملاقات بھی ہوچکی ہے جب کہ ایرانی صدر نے سعودی فرماں روا شاہ سلمان کی جانب سے دورہ سعودیہ کی دعوت بھی قبول کرلی ہے۔ عرب میڈیا کے مطابق سعودی عرب کی جانب سے تکنیکی وفد تہران بھیجے جانے کے بعد اب ایران نے بھی اپنا وفد سعودی عرب بھیجنے کا فیصلہ کیا ہے جس کے جمعہ تک سعودی عرب جانے کا امکان ہے۔میڈیا رپورٹس کے مطابق ایران کی جانب سے وفد سعودی عرب بھیجنے کا مقصد دونوں ممالک کے درمیان سفارتی تعلقات کی بحالی کی راہ مزید ہموار کرنا ہے۔ مقامی میڈیا کے مطابق ایران کے ڈپٹی وزیر خارجہ نے سرکاری ٹی وی پر دیے گئے بیان میں کہا کہ ہم وزارت خارجہ کا وفد جمعہ تک سعودی عرب بھیجنے پر غور کررہے ہیں، اس سلسلے میں دو الگ الگ وفود جدہ اور ریاض جائیں گے۔